Ey vücûd-i kâmilin esrâr-i hikmet masdarı

Ey vücûd-i kâmilin esrâr-i hikmet masdarı
Masdarı zâtın olan eşyâ sıfâtın mahzarı

Mahzarı her hikmetin sensin ki kilk-i kudretin
Safha-i eflâke nakş etmiş hutût-i ahteri

Ahteri mes’ûd olan oldur ki tab’-i pâk ilen
Kâbili feyz ola lûtfundan safâ-yi cevheri

Cevheri ma’yûb olan nâkıs benim kim muttasıl
Sâdedir hattın hayâlinden zamîrîm defteri

Defteri a’mâlimin hattı hatâdandır siyâh
Kan döker çeşmim hayâl ettikçe hevl-i mahşeri

Mahşeri eşkim verir seyl-âba Ger Rûz-i cezâ
Olmasa makbûl-i der-gâhın sirişkim gevheri

Gevheridir aşk bahrinin Fuzûlî âb-i çeşm
Lîk bir gevher ki lûtf-i Hak anadır müşterî