Mey pey-â pey sunma sâki kılma lâ-ya’kil beni

Mey pey-â pey sunma sâki kılma lâ-ya’kil beni
Etme bir dem devlet-i didârdan gâfil beni

Zehr-i kahrın içmeden var ise kastın katlim et
Ab-i Hayvân içsem öldürmek olur müşkil beni

Ar katlimden sana ben teşne âbi tîğine
Öldürür hasret ger öldürmezsen ey kâtil beni

Ben sana hayrân ü benden gayrı senden bî-haber
Şükr ana kim aşkına kılmış hemin kâbil beni

Ey hoş ol ser-mestlik vakti ki ref olup hicâb
Zevk-i mey bî-ihtiyâr eyler sana mâ’il beni

Zevk noksânı bir âfettir bana ey pîr-i deyr
Koyma nâkıs bir nice câm ile kıl kâmil beni

Kurtulam gamdan derim kûyunda ammâ bilmezem
Kurtarır mı bahr-i gam mevcinden ol sâhil beni

Ey Fuzûlî devlet-i bâkî fenâdandır bana
Kim fenâdır eyleyen maksûduma vâsıl beni